Nú er golfsumarið 2013  skollið á, þetta er mikill tilhlökkunartími fyrir flesta kylfinga og í byrjun sumars setja kylfingar sé oft markmið um að bæta forgjöfina.  
Eins og gamla máltækið segir þá er það æfingin sem skapar meistarann, til þess að ná sem mestum framförum er mikilvægt að viðhalda þeirri líkamsþjálfun sem þú ert búinn að vera vinna með í vetur.
Til þess að fá sem mest útúr golfinu í sumar er mikilvægt að kylfingurinn hafi alltaf í huga að hita vel upp fyrir hvern golfhring og einnig að gefa eins og 5-10 mínútur eftir hvern golfhring til þess að teygja á helstu líkamspörtum sem taka þátt í golfsveiflunni.

Hnébeygja, bolvinda og hálsæfingar ættu að vera hluti að allri upphitun fyrir kylfinga. 
Hér fyrir neðan er upphitun sem felur í  sér  dýnamískar hreyfingar með stigvaxandi álagi á alla líkamshluta sem eru virkir í golfsveiflunni.

Byrjaðu á þessari einföldu upphitun áður en þú ferð að pútta, vippa eða slá úr fötu.

Gangi þér vel!

Nokkrar spurningar hafa borist Golfform varðandi líkamsþjálfun fyrir kylfinga. Helgi spurði: Hvaða styrktarþjálfun sé best að leggja áherslu á til þess að auka sveifluhraða?  Góðar æfingar til þess að bæta sveifluhraða eru hvers kyns snúnings æfingar þar sem unnið er til dæmis í trissu eða með æfingateygju. Viðarhögg (e.wood chop) þar sem unnið er einnig með jafnvægi og virkja þarf miðju (e.core) líkamans.  Hugsa þarf um að vinna með æfingarnar í sem bestri golfstöðu, hnéin bogin og bakið beint.
Æfingar sem styrkja vöðvana kringum herðablaðið, eins og hliðarfærsla og miðjufærsla í trissu hjálpa kylfingum einnig mikið við að auka stjórn á kylfunni í sveiflunni.

Kylfingum er velkomið að senda spurningar og fyrirspurnir varðandi líkamsþjálfun fyrir kylfinga á haddi@golfform.is

S - líkamsstaða er einna algengasta dæmið um vöðva ójafnvægi í líkamanum.  Kylfingar með S - líkamsstöðu hafa sveigju inná við í mjóbakinu, orsökin fyrir þessari sveigju er sú að vöðvarnir í mjóbakinu og beygjuvöðvar mjaðma eru stífir og stuttir en kvið vöðvarnir og rassvöðvarnir eru á móti langir og slakir. 

Það var tékkneskur sjúkraþjálfari að nafni Vladamir Janda sem kom með þessa kenningu fram á sjónarsviðið, hann setti samhengi á milli slæmrar líkmasstöðu hjá fólki og þeirra stellinga sem fólk var í allan liðlangan daginn vegna vinnu sinnar. Ef einstaklingur vinnur við skrifborð í átta tíma á dag styttast beygjuvöðvarnir í mjöðmunum, heilinn sendir þá skilaboð um að það þurfi að slaka á gagnverkandi vöðvum beygjuvöðva mjaðmanna sem í þessu tilfelli eru rassvöðvarnir. Þar sem rassvöðvarnir verða óvirkir fara aðrir vöðvar eins og aftan læris vöðvarnir og mjóbaks vöðvarnir að koma inní hreyfingar eins og mjaðmaréttu sem rassvöðvinn ætti að sjá um einn og sér.

Það er einfalt mál að meta hvort kylfingur er með S-líkamsstöðu, ef hann stillir sér upp til þess að slá högg þá getur félaginn athugað stöðuna á bakinu á honum ef það er veruleg sveigja í mjóbakinu þá er kylfingurinn í S-stöðu og er þar af leiðandi í verulegri hættu á að finna fyrir eymslum í baki við golfiðkun. Hætta er á kylfingar setji sig í þessa líkamsstöðu vísvitandi þar sem þeir hafa heyrt talað um að gott sé að stinga rassinum út þegar stilla sér upp fyrir golfhögg.

Sveiflugallar í tengslum við S-líkamsstöðu
1. Hryggsúlan og mjaðmagrindin vinna illa saman.
2. Hætta á hliðarfærslu  á mjaðmagrind í aftursveiflu.
3. Öfug staða á hryggsúlu í efstu stöðu aftursveiflu, líkami hallar frá skotmarkinu.
4. Helstu áhættan er þó fólgin í því að kylfingurinn meiðist í mjóbaki eða þrói með sér krónískan bakverk.

Leiðir til þess að vinna gegn S-líkamsstöðu
1. Teygja á mjóbaki og beygjuvöðvum mjaðma.
2. Styrkja kviðvöðva og rassvöðva.
3. Æfa í spegli hlutlausa uppstillingu fyrir golfsveifluna. Oft gott að notast við 5 járn og leggja það á bakið á sér og verður uppstilling þá auðveldari.

Kylfingar með C-líkamsstöðu eiga yfirleitt erfitt með að klára aftur og framsveilfu, kylfingurinn neyðist til þess að beygja olnboga í aftursveiflunni sem leiðir til kraftleysis í framsveiflunni þar sem hann er búinn að losa um alla þá orkumyndun sem hann er búinn að byggja upp í aftursveiflunni. 
Ástæðan fyrir C-líkamsstöðu er sú að brjóstvöðvarnir eru stuttir og stífir en bakvöðvarnir í brjóstbaki eru hins vegar langir og slappir eða líitið sem ekkert þjálfaðir.
Í nútíma samfélagi er þetta ekki óalgeng líkamsstaða sérstaklega hjá þeim sem vinna við tölvur allan daginn, ofan á þetta vill oft bætast við þetta að höfuðuð verður framstæðara þar sem vöðvarnir aftan í hálsinum lengjast og vöðvarnir framan í hálsinum styttast.

Helstu  sveiflugallar tengdir þessari líkamsstöðu eru:
A.20-30% styttri aftursveifla, vegna takmarkana í bolvindu.
B. Kylfingurinn á til að reisa sig upp í aftursveiflunni. 
C. Kylfingurinn á til með að beygja arma í aftursveiflu til þess að auka sveifluferil.
D. Axlir komast ekki undir höfuð og við það verður oft  hliðarfærsla á líkamanum í aftursveiflu.

Til þess að laga þessa líkamsstöðu þarf að vinna í eftirfarandi þáttum.
1. Byrja þarf á því að vinna með að teygja á brjóstvöðvum. 
2. Styrktaræfingar fyrir vöðva í brjóstbaki eru einnig mikilvægar fyrir kylfinga með þessa líkamsstöðu.
3. Hættu að gera kviðkreppur á gólfi eða í tækjum, kviðkreppur stuðla að C-líkamsstöðu og því eru kviðkreppur ekki æskilegar fyrir kylfinga.